Hay’adda Maareynta Musiibooyinka Qaranka Soomaaliyeed (SoDMA) ayaa magaalada Muqdisho kulan sagootin ah ugu qabatay Mudane Nicolas Joannic, Madaxa Barnaamijyada ee Barnaamijka Cunnada Adduunka (WFP).

Kulanka waxaa ka qeyb galay masuuliyiin ka socday Xafiiska Ra’iisul Wasaaraha, hay’adaha dowladda iyo marti sharaf kale, kuwaas oo ku ammaanay dadaalkii iyo kaalintii wax-ku-oolka ahayd ee uu Mudane Nicolas Joannic ka qaatay howlaha bani’aadannimada iyo taageerada shacabka Soomaaliyeed intii uu dalka ka shaqeynayay.

Guddoomiye Ku-xigeenka Hay’adda SoDMA, Dr. Axmed Cabdi Aadan, ayaa bogaadiyay dadaallada iyo wada-shaqeynta dhow ee WFP, isaga oo xusay in iskaashiga labada dhinac uu door weyn ka qaatay taageeridda bulshada Soomaaliyeed ee ay saameeyeen abaaraha, fatahaadaha iyo xaaladaha kale ee bani’aadannimo.

Ugu dambeyn, Hay’adda SoDMA ayaa Mudane Nicolas Joannic guddoonsiisay shahaado sharaf lagu maamuusayo adeeggiisa hagar la’aanta ah iyo taageerada farsamo ee uu u fidiyay shacabka iyo Dowladda Federaalka Soomaaliya.