Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macallin Cabdulle, ayaa magaalada Baydhabo ku soo xiray Shirka Arrimaha Bani’aadannimada Soomaaliya.

Shirka waxaa ka qayb galay wakiillo ka socday beesha caalamka, hay’adaha Qaramada Midoobay, hay’adaha caalamiga ah iyo kuwa maxalliga ah, dowladaha xubnaha ka ah Federaalka, iyo ururrada bulshada rayidka ah. Intii uu shirku socday waxaa diiradda lagu saaray sidii loo dardargelin lahaa dadaallada soo kabashada abaaraha, isla markaana loo xoojin lahaa u diyaar-garowga khataraha la xiriira El Niño 2026.

Ka qaybgalayaashu waxay isku raaceen in mudnaanta la siiyo ka hortagga iyo u diyaar-garowga khataraha la saadaalinayo ka hor inta aysan dhicin, halkii laga sugi lahaa in wax laga qabto marka ay musiibooyinku dhacaan.

Guddoomiyaha SoDMA, Mudane Maxamuud Macallin Cabdulle, ayaa sheegay in hay’addu sii wadi doonto wacyigelinta bulshada iyo bixinta digniinaha hore ee la xiriira khataraha ka dhalan kara El Niño 2026, si loo yareeyo saameynta ay ku yeelan karto bulshada.

Ugu dambeyn, Guddoomiyuhu wuxuu uga mahadceliyay Dowlad-goboleedka Koonfur Galbeed martigelinta shirka iyo doorkii uu ka qaadatay qabsoomidda Madasha Arrimaha Bani’aadannimada Soomaaliya.