Shirka Warbaahinta iyo Xiriirka Dowladda ayaa maanta ka furmay magaalada Muqdisho, waxaana shir guddoominaya Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macalin Cabdulle. Shirka waxaa diiradda lagu saaraya xaaladda abaarta ee ka jirta dalka iyo sidii loo xoojin lahaa wacyigelinta, isla markaana loo mideyn lahaa fariimaha la gaarsiinayo bulshada.

Waxaa ka qeyb galaya Af-hayeenka Xukuumadda Federaalka Soomaaliya Cabdinaasir Axmed Bashiir, Agaasimeyaasha warbaahinta iyo xiriirka dowladda, iyo saraakiisha warbaahinta hay’adaha iyo wasaaradaha dowladda, si loo xoojiyo isku-duwidda warbaahinta iyo dadaallada gurmadka abaarta.

Ka qeybgalayaasha shirka ayaa isku raacay in si buuxda looga shaqeeyo ka hortagga iyo wax-ka-qabashada xaaladda abaarta ee dalka, isla markaana warbaahintu ay qaadato door muuqda oo ka qeybqaata gaarsiinta gurmadka iyo taageerada dadka nugul ee ku nool meelaha ugu daran dalka.

Guddoomiyaha Hay’adda SoDMA wuxuu sheegay in Soomaaliya ay wajahaysa xaalad abaareed oo aad u daran, taasoo si weyn u saameysay dhammaan gobollada dalka, gaar ahaan bulshada ku tiirsan xoolaha iyo beeraha. Abaartan ayaa sababtay biyo la’aan baahsan, biyo La’aan, hoos u dhac ku yimid wax-soo-saarkii beeraha, iyo dhibaato soo wajahday xoolo-dhaqatada.

Mudane Maxamuud Macalin Cabdulle ayaa xusay in hoos u dhac ku yimid deeqihii gargaarka ee beesha caalamka, taasoo caqabad ku noqotay dadaallada gurmadka iyo samatabbixinta. Wuxuu carrabka ku adkeeyay in loo baahan yahay in la xoojiyo isku-duubnida iyo isku-tashiga shacabka Soomaaliyeed si looga hortago in xaaladdu isu beddesho masiibo bani’aadamnimo oo baahsan.

Ugu dambeyn, Guddoomiyaha Hay’adda Maareynta Musiibooyinka Qaranka SoDMA ayaa ugu baaqay warbaahinta qaranka iyo tan gaarka loo leeyahay inay qaataan kaalintooda wacyigelineed, isla markaana ay mideeyaan fariimaha rasmiga ah ee ku aaddan ka hortagga iyo ka jawaabista abaarta, si bulshada loo gaarsiiyo xog sax ah oo mideysan.