Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macallin Cabdulle, oo ay wehliyaaan Wasiiradda Gargaarka iyo Haweenka Koonfur Galbeed, ayaa maanta qaabilay Wakiilka Hay’adda Cuntada iyo Beeraha Qaramada Midoobay (FAO) ee Soomaaliya, Mudane Etienne Peterschmitt.

Kulanka waxaa looga hadlay xaaladda bani’aadannimo ee dalka, u diyaar-garowga Super El Niño, iyo sidii gargaar loo gaarsiin lahaa dadka ku nool goobaha ay weli ka jiraan xaaladaha bani’aadannimo.

Labada dhinac ayaa xoogga saaray dardargelinta dadaallada ka hortagga iyo yareynta fatahaadaha, gaar ahaan xoojinta difaacyada webiyada iyo xiridda meelaha jilicsan.

Ugu danbeyn, Guddoomiyaha Hay’adda SoDMA Mudane Maxamuud Macallin Cabdulle ayaa ka warbixiyay socdaalkii uu dhawaan ku tagay Gobalka Hiiraan oo kamid ah Goobaha ugu nugul fatahaadaha, isagoo ku baaqay in la mideeyo dadaallada lagu badbaadinayo dadka iyo hantidooda.