Guddoomiye Ku-xigeenka Hay’adda SoDMA, Dr. Axmed Cabdi Aadan, ayaa shir guddoomiyay kulan ay ka qeybgaleen hay’adaha dalalka ku bahoobay Ururka Iskaashiga Islaamka (OIC), kaas oo looga hadlay u diyaar-garowga iyo ka jawaabista saameynta Super El Niño.

Kulanka waxaa lagu soo bandhigay xog ku saabsan saadaasha El Niño, baaxadda saameyntiisa iyo gobollada Soomaaliya ee laga cabsi qabo inay si gaar ah u saameeyaan roobabka iyo fatahaadaha.

hay’adaha dalalka ku bahoobay Ururka Iskaashiga Islaamka (OIC), ayaa ballanqaaday inay si dhow ula shaqeyn doonaan Hay’adda SoDMA, halka Kaaliyaha Guddoomiyaha Hay’adda SoDMA ee Arrimaha Carabta iyo Islaamka, Cabdiraxmaan Maxamed Xuseen, uu xusay muhiimadda xoojinta iskaashiga iyo wada-shaqeynta.

Ugu dambayn, waxaa la isla qaatay in la xoojiyo wada-shaqeynta, si loo yareeyo saameynta musiibada loona ilaaliyo nolosha iyo badqabka bulshada Soomaaliyeed.