Kulanka waxaa diiradda lagu saaray arrimo muhiim ah oo hortabin u leh hay’adda SoDMA iyo wasaaradaha maaraynta masiibooyinka ee dowlad-goboleedyada. Labada dhinac ayaa ka wada hadlay sidii loo xoojin lahaa iskaashiga dhismaha awoodaha maaraynta masiibooyinka heer federaal iyo heer dowlad-goboleed, iyadoo si gaar ah loo eegay yareynta khataraha isbeddelka cimilada si loo yareeyo barakaca bulshada Soomaaliyeed gudaha iyo dibadda dalka.

Dhankiisa Guddoomiyaha SoDMA Mudane Maxamuud Macallin ayaa ku dhiirrigeliyay hay’adaha dowliga ah iyo kuwa aan dowliga ahayn ee ka shaqeeya gargaarka iyo maaraynta masiibooyinka in ay sii xoojiyaan wada-shaqeynta. Sidoo kale waxa uu uga mahadceliyay IOM taageerada muuqata ee ay ku bixiyaan gudaha iyo dibadda dalka, taas oo wax badan ka tari karta xaaladaha bani’aadantinimo ee horyaalla shacabka Soomaaliyeed.

Kulankan ayaa qeyb ka ahaa dadaallada joogtada ah ee Hay’adda SoDMA ay ku doonayso in wax looga qabto xaaladaha bani’aadantinimo ee dalka ka jira, iyadoo la xoojinayo iskaashiga caalamiga ah iyo kan gudaha.