Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macallin Cabdulle, ayaa Muqdisho ka furay Shir Qaran oo lagu dardargelinayo u-diyaargarowga saameynta la filayo ee Super El Niño 2026.

Shirkaan waxaa ka qeyb galay Wasaarado ka tirsan Dowladda Federaalka Soomaaliya, Wasaaradaha Dowlad-goboleedyada ee qaabilsan Gargaarka iyo Maareynta Musiibooyinka, Xafiiska Madaxweynaha dalka, Hoggaanka Rugta Ganacsiga, Hoggaanka Culimada, iyo wakiillo ka socday hay’adaha caalamiga ah iyo kuwa maxalliga ah.

Shirka waxaa lagu soo bandhigay walaaca laga qabo saadaasha cimilada oo tilmaamaysa suuragalnimo sare oo Super El Niño ah iyo roobab culus, xilli qeybo badan oo dalka ka mid ah ay weli ka soo kabanayaan saameyntii abaarta.

Guddoomiyaha Hay’adda Maareynta Musiibooyinka Qaranka SoDMA, Mudane Maxamuud Macallin Cabdulle, ayaa sheegay in xaaladda bani’aadantinimo ee dalka ay u baahan tahay isku-duwid iyo wada-shaqeyn degdeg ah, si bulshada nugul loo gaarsiiyo gurmad waqtigiisa ku habboon.

Wuxuu ku booriyay dowladda, dowlad-goboleedyada iyo bah-wadaagta bani’aadantinimada inay yeeshaan qorshe mideysan oo ku saleysan tallaabooyin hore, si loo yareeyo saameynta musiibooyinka loona badbaadiyo nafaha.