Guddoomiyaha Hay’adda Maareynta Masiibooyinka Qaranka (SoDMA), Mudane Maxamuud Macalin Cabdulle, ayaa ka qeyb galay Kulanka Isku-duwidda Maaliyadda Cimilada ee hoos yimaada Tiirka 4-aad ee Qorshaha Isbeddelka Qaranka (NTP), kaas oo ay soo qabanqaabisay Wasaaradda Deegaanka iyo Isbeddelka Cimilada ee Jamhuuriyadda Federaalka Soomaaliya, iyadoo kaashaneysa Wasaaradda Maaliyadda, gaar ahaan Sanduuqa Qaranka ee Cimilada (NCF).

Kulankan ayaa isu keenay wakiillo ka socday Xafiiska Ra’iisul Wasaaraha, wasaaradaha Federaalka, Hay’adda SoDMA, Xarunta Qaranka ee Horumarinta Reer-miyiga iyo Xalalka Waara (NCRDS), Bangiga Horumarinta iyo Dib-u-dhiska Soomaaliya (SDRB), iyo hay’ado kale oo muhiim ah.

Intii uu socday waxaa diiradda lagu saaray xoojinta isku-duwidda maaliyadda cimilada, ka faa’iideysiga fursadaha maalgelinta, iyo diyaarinta mashaariic waafaqsan Tiirka 4-aad ee NTP, si loo xoojiyo adkeysiga dalka ee saameynta isbeddelka cimilada.

Guddoomiyaha Hay’adda SoDMA Mudane Maxamuud Macalin Cabdulle ayaa ka qeyb-galayaasha ku adkeeyay muhiimadda ay leedahay iskaashi dhow oo u dhexeeya hay’adaha dowladda, bah-wadaagta horumarinta iyo hay’adaha maaliyadeed si loo helo maalgelin waarta oo taageerta diyaar-garowga, ka hortagga iyo wax ka qabashada saameynta masiibooyinka ka dhasha isbeddelka cimilada.