𝐌𝐮𝐪𝐝𝐢𝐬𝐡𝐨, 𝐉𝐮𝐮𝐧 𝟐𝟕, 𝟐𝟎𝟐𝟔: Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macallin Cabdulle, oo ay wehliyaan qaar ka mid ah Wasiirrada Gargaarka ee Dowlad-goboleedyada, ayaa maanta magaalada Muqdisho kulan sagootin ah ugu sameeyay 25 sarkaal oo ka kala socda Hay’adda SoDMA iyo Wasaaradaha Gargaarka ee Dowlad-goboleedyada, kuwaas oo tababar ku saabsan u diyaar-garowga, ka hortagga iyo ka jawaabista fatahaadaha ku soo qaadan doona Jamhuuriyadda Shacabka Shiinaha.

Saraakiishan ayaa loo diray tababarka xilli la saadaalinayo inay dalka ka da’aan roobabka Dayrta ee la xiriira ifafaalaha Super El Niño, kuwaas oo la filayo inay sababaan fatahaado iyo daadad qeyb ka mid ah dalka.

Ugu dambeyn, Guddoomiyaha Hay’adda SoDMA, Mudane Maxamuud Macallin Cabdulle, waxuu saraakiisha kula dardaarmay inay muujiyaan hufnaan, anshax iyo waddaniyad inta ay ku guda jiraan tababarka, isla markaana marka ay dalka dib ugu soo laabtaan ay aqoonta iyo xirfadaha ay la wadaagaan hay’adaha ay ka tirsan yihiin, si loo xoojiyo awoodda qaranka ee u diyaar-garowga iyo wax ka qabashada musiibooyinka, gaar ahaan fatahaadaha ka dhasha roobabka.