Guddoomiyaha Hay’adda Maareynta Musiibooyinka Qaranka (SoDMA), Maxamuud Macallin Cabdulle, oo Maanta ka qeybgalay shirweynaha culimada Soomaaliyeed,ayaa culimada uga warbixiyay xaaladda adag ee dalka, gaar ahaan abaarta ba’an ee heerkeedu sii kordhayo.

Waxa uu tilmaamay in Hay’adda SoDMA ay xooga saarayso maareynta abaaraha, fatahaadaha iyo musiibooyinka dabiiciga ah, isla markaana uu kulanka u yimid si uu culimada ula wadaago xogo ku saabsan xaaladda bini’aadantinimo ee dalka.

Guddoomiye Maxamuud Macallin wuxuu ugu baaqay culimada inay hoggaamiyaan olole ballaaran oo gurmad iyo wacyigelin ah, si loo taageero dadka ay abaartu si xun u saamaysay ee u baahan gargaar degdeg ah.