Hay’adda Maareynta Musiibooyinka Qaranka ee, oo kaashaneysa Wasaaradda Gargaarka dowlad goboleedka Koonfur Galbeed, ayaa maanta magaalada Baydhabo waxa ay ka daahfurtay biyo-dhaamin muddo toddobaad ah socon doonta, taas oo loogu gurmanayo bulshada ay saameeyeen abaaraha ba’an ee dalka ka jira ee ku nool gudaha magalaada iyo tuulooyinka ku xeeran.

Biyo-dhaamintaan waxaa daahfuray wasiir ku Xigeenka Wasaaradda Gargaarka dowlad goboleedka Koonfur Galbeed Cabdullaahi Isaaq Macalin (Wasiir Ganeey), waxaana diiradda lagu saarayaa biyo dhaamintaan in biyo nadiif ah dadka iyo xoolaha ku nool deegaannada ay ka jirto biyo la’aanta la gaarsiiyo.iyadoo lagu gaarsiinayo gaadiid gaar ah oo loogu talagalay biyo-dhaaminta si loo yareeyo saameynta ay abaartu ku yeelatay nolosha dadka deegaanka.

Isla maanta dhowr booyadood ayaa biyo dhaamin ka sameeyay qaar kamid ah xaafadaha magaalada Baydhabo iyo tuulooyinka hoostaga oo dadka aad ugu tabaalaysnayeen biyo la’aan dartood.

Kaaliyaha guddoomiyaha SoDMA Cabdiraxmaan Maxamed Xuseen ayaa sheegay in biyo dhaamintaan ay socon doono inta ay jirto baahida, isla markaana ay sii wadi doonaan dadaallada lagu taageerayo bulshada ay abaaruhu saameeyeen