Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa ka qeyb galay munaasabadda xuska 65-guurada xiriirka diblomaasiyadeed ee u dhexeeya Jamhuuriyadda Federaalka Soomaaliya iyo Jamhuuriyadda shacabka Shiinaha, taas oo lagu qabtay magaalada Muqdisho.

Munaasabadda waxaa sidoo kale ka qeyb galay Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macallin Cabdulle, oo si qoto dheer uga hadlay muhiimadda uu leeyahay xiriirka taariikhiga ah ee ka dhaxeeya labada dal.

Guddoomiyuhu wuxuu xusay in xiriirka Soomaaliya iyo Shiinaha uu ku dhisan yahay ixtiraam, iskaashi iyo taageero joogto ah, isagoo tilmaamay in Dowladda Shiinaha ay mar walba garab taagneyd shacabka Soomaaliyeed, gaar ahaan xilliyada adag ee ay dalka ka jireen musiibooyin dabiici ah, abaaro, fatahaado iyo xaalado bini’aadannimo.

Ugu dambeyn, Mudane Maxamuud Macallin Cabdulle ayaa si gaar ah u ammaanay kaalinta muuqata ee Dowladda Shiinaha ay ka qaadatay taageerada gargaarka degdegga ah, horumarinta adeegyada aasaasiga ah iyo xoojinta adkeysiga bulshada, isagoo carrabka ku adkeeyay in taageeradaasi ay door weyn ka qaadatay badbaadinta nolosha kumannaan qoys oo Soomaaliyeed.