Guddoomiye Ku-xigeenka Hay’adda Maareynta Musiibooyinka Qaranka Soomaaliyeed (SoDMA), Dr. Axmed Cabdi Aadan, ayaa xarunta dhexe ee Hay’adda SoDMA ku qaabbilay Madaxa Hay’adda UNICEF ee Soomaaliya, Marwo Sandra Lattouf.

Kulanka waxaa diiradda lagu saaray xoojinta iyo adkaynta wada shaqeynta ka dhaxeysa labada hay’adood, gaar ahaan isku dubbaridka dadaallada gurmadka iyo ka jawaabista xaaladaha abaareed ee ka jira dalka.

Madaxa UNICEF ee Soomaaliya Marwo Sandra Lattouf ayaa bogaadisay dadaallada joogtada ah ee Hay’adda SoDMA ee ku aaddan ka jawaabista xaaladaha abaarta iyo musiibooyinka dabiiciga ah ee dalka ka dhaca. Waxay sheegtay in UNICEF
ay muddo dheer ka shaqaynaysay Soomaaliya, iyadoo bixisa taageero la xariirta dhinacyada caafimaadka, nafaqada, biyaha iyo ilaalinta carruurta.

Ugu Danbeyn, Guddoomiye Ku-xigeenka Hay’adda SoDMA Dr. Axmed Cabdi Aadan waxuu uga mahadceliyay UNICEF wada shaqeynta joogtada ah ee ay la leeyihiin SoDMA, isaga oo ku baaqay in la sii xoojiyo iskaashiga, si wax looga qabto xaalada abaareed ee saameysay bulshada Soomaaliyeed.