Wasaaradda Qorsheynta, Maalgashiga iyo Horumarinta Dhaqaalaha oo kaashanaysa Hay’adda Maareynta Musiibooyinka Qaranka (SoDMA) ayaa maanta magaalada Muqdisho ku qabtay kulan Miro-dhal ah oo lagu dardargelinayo gurmadka abaaraha ka jira qeybo badan oo dalka ah.
Kulanka oo uu shir-guddoomiyay Wasiirka Qorsheynta, Mudane Maxamuud Cabdiraxmaan Sheekh Faarax (Beenebeene), waxaa ka qeyb galay Guddoomiyaha SoDMA, Mudane Maxamuud Macalin Cabdulle, iyo agaasimayaal ka tirsan labada dhinac. Mas’uuliyiinta ayaa si qoto dheer uga wada hadlay sidii si degdeg ah loogu gurman lahaa bulshada ay abaartu saameysay, loona mideyn lahaa howlaha gurmadka ee dowladda.
Kulanka ayaa sidoo kale lagu falanqeeyay sababaha aasaasiga ah ee keenay abaarta, gaar ahaan roobabkii Gu’ga iyo Dayrta oo inta badan aan ka da’in gobollada dalka.
Shirka wuxuu qeyb ka yahay dadaallada daba-socda go’aankii Golaha Wasiirrada ee farayay hay’adaha dowladda in ay kordhiyaan gurmadka degdegga ah ee dalka .
0 Comments