MUQDISHO, SOOMAALIYA — Munaasabad xusid mudan oo hoosta ka xariiqaysa sida ay uga go’an tahay dhisidda awoodaha shaqaaleheeda, ayaa Hay’adda Maareynta Masiibooyinka Soomaaliyeed (SoDMA) waxay casho sharaf sagootin ah u sameysay shaqaalaheeda u dhoofaya Jamhuuriyadda Dadka Shiinaha si ay uga qayb galaan barnaamij tababar oo gaar ah.
Kooxdan, oo ka kooban 20 shaqaale oo ka socda SoDMA, iyo shaqaale kale oo ka socda Wasaaradda Arrimaha Gudaha, ayaa ah wajigii labaad ee ay hay’addu dirto si ay u sii waddo barnaamijkeeda joogtada ah ee lagu kordhinayo diyaargarowga dalka ee wax-ka-qabashada masiibooyinka. Wajiga koowaad ayaa si guul ah uga qaybgalay tababar la mid ah dhammaadkii sanadkii 2024.

Dadaallada ay SoDMA ku maalgashanayso shaqaaleheeda waxaa loo arkaa saldhigga dhisidda nidaam qaran oo xooggan oo waara oo loogu talagalay maareynta masiibooyinka. Hay’addu waxay aaminsan tahay in aqoonta iyo khibradda laga helayo barnaamijyada tababarka caalamiga ah ay lagama maarmaan u yihiin in shaqaaluhu ay noqdaan hoggaamiyeyaasha isbeddelka ee dhinaca maareynta xaaladaha degdegga ah.

Khudbad uu ka jeediyay munaasabadda, Guddoomiyaha Hay,adda, Mudane Maxamuud Macallin Cabdulle, wuxuu ku nuuxnuuxsaday in tababarkan uu yahay maalgashi istiraatiiji ah oo lagu samaynayo mustaqbalka Soomaaliya. Wuxuu yiri: “Waxaan aaminsanahay in dhisidda awoodaha shaqaaleheena ay tahay tiir-dhexaadka dhisidda qaran xooggan oo adkaysi u leh, awoodna u leh inuu shacabkiisa ka ilaaliyo masiibooyinka dabiiciga ah iyo kuwa dad-sameynta ah. Safarkan maaha oo kaliya fursad lagu helo aqoon, balse waa tallaabo muhiim ah oo lagu xoojinayo awooddeena ah inaan si wax-ku-ool ah u qorshayno, wax uga qabanno, oo aan u soo kabsanno.” Wuxuu intaa ku daray in shaqaaluhu ay si wanaagsan u matalayaan Soomaaliya, ayna tahay inay ka faa’iideystaan wax kasta oo ay baran doonaan.

Dhinaciisa, Guddoomiye Ku-xigeenka hay’adda, Dr. Axmed Cabdi Aadan, ayaa ka hadlay sida ay SoDMA uga go’an tahay dhisidda koox khubaro ah, isagoo xusay inay yihiin hantida ugu qaalisan ee hay’adda. Wuxuu yiri: “Safarkan maaha oo kaliya tababar, waa maalgashi toos ah oo lagu samaynayo mustaqbalka Soomaaliya. Maanta, waxaad tihiin safiiro u matalaya hay’adda iyo shacabka Soomaaliyeed, waxaana idin kaga fadhinaa inaad aqoontan cusub ku dabaqaysaan si wax ku ool ah si aad u noqotaan hoggaamiyeyaasha isbeddelka ee dhinaca maareynta xaaladaha degdegga ah iyo masiibooyinka.”

Barnaamijka tababarka, oo cinwaankiisu yahay “Kahortagga iyo Yareynta Musiibooyinka ee Soomaaliya,” waxaa maalgelinaysa Wasaaradda Ganacsiga ee Jamhuuriyadda Shacbiga  Shiinaha, waxaana soo agaasimay Xarunta Tababarka ee Laanqayrta Cas ee Shiinaha, wuxuuna socon doonaa muddo 24 maalmood ah magaalada Beijing.