LAASCAANOOD, SOOMAALIYA — Talaabo muhiim ah oo lagu xoojinayo awoodda ka-jawaabista xaaladaha degdegga ah, ayaa maanta Hay’adda Maareynta Masiibooyinka Soomaaliyeed (SoDMA) waxay ku dhawaaqday in ay bilowday wejiga fulinta ee dhismaha Xarunta Hawlgallada Degdegga ah ee Dowlad-goboleedka Waqooyi Bari iyo bakhaarkeeda ku lifaaqan. Mashruucan oo ujeedadiisu tahay in lagu xoojiyo diyaar-garowga masiibooyinka, wuxuu yimid ka dib dhagax-dhigga uu Raysal Wasaaruhu sameeyay bishii Abriil ee la soo dhaafay, waxaana maalgeliyay Safaaradda Shiinaha ee Muqdisho.

Munaasabadda daahfurka waxaa hoggaaminayay Guddoomiyaha Hay’adda, Mudane Maxamuud Macallin Cabdulle, oo ay la socdeen Wasiirka Gargaarka iyo Maareynta Masiibooyinka ee Dowlad-goboleedka, Mudane Cabdirisaaq Yuusuf Maxamed (Hindi), iyadoo ay goob joog ahaayeen mas’uuliyiin ka socday maamulka gobolka iyo wakiillo ka socday shirkaddii dhismaha.

Muhiimadda Istaraatiijiga ah ee Lagu Wajihayo Caqabadaha Bani’aadannimada

Dhismaha xaruntan iyo bakhaarkeeda ku lifaaqan ayaa leh muhiimad istaraatiiji ah oo aad u sarreysa, maadaama ay tahay gobol si joogta ah u wajahaya caqabado cimilo oo adag sida abaaraha iyo fatahaadaha. Xaruntan waxay u shaqeyn doontaa sidii saldhig saadka oo muhiim ah, taasoo awood siinaysa in raashinka iyo agabka gargaarka loo kaydiyo horeyba, si loo hubiyo xawaaraha iyo waxtarka ka-jawaabista marka ay dhibaato dhacdo, taasoo yareynaysa saameynta xun ee nolosha dadka deegaanka.

Hadalkiisii uu ka jeediyay munaasabadda, Guddoomiyaha Hay’adda Maareynta Masiibooyinka Soomaaliyeed, Mudane Maxamuud Macallin Cabdulle, ayaa ku nuuxnuuxsaday: “Xaruntan ma aha oo kaliya dhismo; waa tiir aasaasi ah oo ka mid ah adkeysiga qarankeena. Waxay si weyn u xoojinaysaa awooddeena aan ku ilaalino muwaadiniinteena kuna jawaabno si sharaf iyo degdeg ah dhibaato kasta. Mashruucan wuxuu ka tarjumayaa ballan-qaadka aan leexleexadka lahayn ee dowladeenu ay u hayso nabdoonaanta iyo wanaagga dhammaan dadka Soomaaliyeed.

Dhinaciisa, Wasiirka Gargaarka iyo Maareynta Masiibooyinka ee Dowlad-goboleedka, Mudane Cabdirisaaq Yuusuf Maxamed (Hindi), ayaa yiri: “Dadka Waqooyi Bari waxa ay muddo dheer soo mareen caqabado bani’aadannimo. Xaruntan waxay noqon doontaa mid isbeddel weyn keenta. Waxay noo sahlaysa inaanu la shaqeyno shuraakada, aanu kaydano agabka, oo aanu gaarno bulshooyinka dhibaataysan si ka dhakhso badan sidii hore. Waa maalgashi toos ah oo lagu sameeyay ammaanka iyo mustaqbalka dhammaan dadka deegaankan.”

Wakiilka shirkadda dhismaha ee Sahel Construction, oo ku guuleysatay qandaraaska mashruuca, ayaa yiri: “Waxaanu u mahadcelineynaa inaanu noqonay shirkadda ay dowladda Federaalka ah ay u dooratay inaanu fulinno hawshan muhiimka ah oo loogu talagalay Maamul Goboleedka Waqooyi Bari. Waxaanu ognahay in aanu imtixaan ku jirno si aanu hawshan u dhammeyno sida ugu wanaagsan, waxaana ballan-qaadeynaa inaanu ku dhameyno muddo saddex bilood gudahood ah ama ka yar.”

Gunaanad

Mashruucan ayaa astaan u ah bilowga weji cusub oo ka mid ah dadaallada qaran ee Soomaaliya ee lagu dhisayo kaabayaasha waara ee maareynta masiibooyinka. Xaruntan, waxaa lagu xoojin doonaa awoodda isku-dubbaridka laamaha kala duwan ee dowladda iyo shuraakada caalamiga ah, taasoo hubinaysa jawaab isku-dhafan oo habaysan oo lagu wajihayo caqabadaha mustaqbalka, sidoo kale waxay gacan ka geysaneysaa dhisidda bulsho ka adkaysi badan oo ammaan ah.