Muqdisho, Soomaaliya — Guddoomiyaha Hay’adda Maaraynta Masiibooyinka Soomaaliyeed (SoDMA), Mudane Maxamuud Macallin Cabdulle, ayaa maanta xafiiskiisa ku qaabilay wafdi ka socday Xarunta King Salman ee Gargaarka iyo Hawlaha Bani’aadannimada (KSrelief). Wafdiga waxaa hoggaaminayay Agaasimaha laanta Afrika ee Xarunta, Mudane Yaziid Cabdullaahi Xamuud.

Kulankan ayaa ujeedadiisu ahayd xoojinta wada-shaqeynta dhinaca gargaarka iyo isku-duwida dadaallada wax-ka-qabashada dhibaatooyinka bani’aadamnimo iyo masiibooyinka dabiiciga ah ee Soomaaliya. Sidoo kale, kulanka waxaa goobjoog ka ahaa kaaliyaha Guddoomiyaha SoDMA ee arrimaha Carabta iyo Islaamka, Mudane Cabdiraxmaan Xuseen, iyo Agaasimaha Ururka Al-Tadamun, Mudane Cabdiraxmaan Cabdirisaaq.

Wadahadallada ayaa diiradda lagu saaray dardargelinta jawaabaha bini’aadannimo si loo daboolo baahiyaha degdegga ah ee bulshooyinka ay saameeyeen xaaladaha bini’aadannimo ee adag.

Mudane Yaziid Xamuud ayaa xaqiijiyay ballanqaadka adag ee Xarunta King Salman ee ah bixinta taageerada joogtada ah ee dowladda iyo shacabka Soomaaliyeed. Waxa uu hoosta ka xariiqay in isku-dubbaridka wax-ku-oolka ah ee u dhexeeya hay’adaha gargaarka iyo SoDMA uu yahay mid muhiim u ah hubinta in gargaarku uu si degdeg ah oo wax-ku-ool ah ku gaaro dadka ugu baahida badan.

Dhinaciisa, Mudane Maxamuud Macallin Cabdulle ayaa u mahadceliyay dowladda Boqortooyada Sacuudi Carabiya iyo Xarunta King Salman oo kaalintooda joogtada ah ee dadaallada gargaarka ee Soomaaliya. Waxa uu xaqiijiyay in SoDMA ay sii wadi doonto shaqadeeda ah hubinta in gargaarka bini’aadannimo uu gaaro dadka ugu nugul ee ku nool meelaha fog fog iyo kuwa ay adag tahay in la gaaro.

Kulankan wuxuu xoojinayaa iskaashigii hore ee u dhexeeyay SoDMA iyo Xarunta King Salman, kaas oo markhaati ka ahaa iskaashi guuleystay oo ku aaddan ka jawaabista masiibooyinka dabiiciga ah sida abaaraha iyo fatahaadaha. Iskaashigan wuxuu tusaale u yahay wada-shaqayn bini’aadannimo oo wax-ku-ool ah oo ku dhisnayd isku-kalsoonaan iyo aragti wadaag ah oo ah bixinta taageero degdeg ah oo habaysan oo loogu talagalay shacabka Soomaaliyeed.