BELED XAAWO, JUBALAND, SOOMAALIYA — Mid ka mid ah Agaasimayaasha Guud ee Hay’adda Maareynta Musiibooyinka Soomaaliyeed (SoDMA), Mudane Cabdirashiid Maxamuud Xasan, oo uu wehelinayo Guddoomiyaha Degmada Beled Xaawo, Mudane Shire Cabdullaahi Keynaan, ayaa subaxnimadii Maanta xarunta degmada ku guddoomiyay kulan gaar ah oo ay la yeesheen hay’adaha samafalka ee ka howlgala degmada.

Kulankan oo ahaa mid deg-deg ah, ayaa looga hadlay xaaladda bani’aadannimo ee ka jirta Beled Xaawo iyo tuulooyinka hoostaga, oo ay sababeen colaado iyo duruufo nololeed oo adag. Waxaa si gaar ah diiradda lagu saaray sidii loo dardargelin lahaa gargaarka la gaarsiinayo dadka nugul iyo in la xoojiyo howlgallada ay fulinayaan hay’adaha samafalka ee gobolka Gedo.

Mas’uuliyiinta ayaa isla gartay in la sameeyo hannaan wadajir ah oo lagu hubinayo in mashaariicda samafalka iyo adeegyada degdegga ah loo fuliyo si hufan, iyadoo mudnaan gaar ah la siinayo baahiyaha dhabta ah ee bulshada deegaanka.

Dhanka kale, Hay’adaha samafalka ayaa soo bandhigay waxqabadkooda, caqabadaha ay la kulmaan, iyo talooyin ku saabsan sidii loo xoojin lahaa iskaashiga kala dhexeeya dowladda, maamulka degmada iyo bulshada rayidka ah.

Kulanka ka dib, Agaasimaha Guud  ayaa la hadaly Telefishinka Qaranka Soomaaliyeed (SNTV), wuxuuna ka hadlay ujeeddooyinka booqashada wafdiga SoDMA ee gobolka Gedo labadii toddobaad ee la soo dhaafay. Wuxuu sheegay in ujeeddada ugu weyn ay ahayd sidii loo qiimeyn lahaa xaaladda bani’aadannimo ee ka jirta gobolka, loona dejin lahaa qorshe wadajir ah oo lagu caawinayo dadka ay musiibooyinku saameeyeen.

Wuxuu sidoo kale faahfaahiyay go’aamadii ka soo baxay kulanka deg-degga ah, isagoo xusay in la isla gartay sidii si hufan loo mideyn lahaa howlgallada gargaarka, loona abuuri lahaa hanaan wadajir ah oo lala shaqeeyo hay’adaha samafalka.

Agaasimuhu wuxuu iftiimiyay doorka ay SoDMA ku leedahay hagidda iyo isku-dubbaridka howlaha bani’aadannimo ee dalka. Wuxuu sheegay in hay’addu ay u adeegto sidii hoggaamiyaha ugu weyn ee xaaladaha deg-degga ah, isku-dubbarida jawaabaha deg-degga ah ee ka imaanaya hay’adaha kala duwan ee dowladda, beesha caalamka, iyo hay’adaha maxaliga ah si loo hubiyo in gargaarka uu u gaaro dadka u baahan si degdeg ah oo hufan. Doorkan wuxuu muhiimad gaar ah u leeyahay in la sameeyo xal waara oo lagu wajahayo caqabadaha isdaba-joogga ah ee dalka ka jira.