Muqdisho – 17 Juun 2025: Guddoomiyaha Hay’adda Maareynta Masiibooyinka Soomaaliyeed (SoDMA), Mudane Maxamuud Macallin Cabdulle, ayaa maanta si rasmi ah u daahfuray Shirka Wadatashiga Dib-u-eegista Siyaasadda Qaranka ee Maareynta Masiibooyinka, oo ka furmay magaalada Muqdisho.

Shirkan muhiimka ah ayaa ujeedkiisu yahay in dib loo eego, lana tayeyo Siyaasadda Qaranka ee Maareynta Masiibooyinka, iyadoo laga duulayo xaaladda dhabta ah ee dalka, loona marayo wadatashi ballaaran oo ay ka qeybgalayaan daneeyeyaasha kala duwan ee la xiriira arrimaha gargaarka iyo maareynta musiibooyinka.

Shirka ayaa waxaa kasoo qeyb galay mas’uuliyiin heerar kala duwan leh oo ay kamid yihiin, Wasiiru Dowlaha Wasaaradda Tamarta iyo Kheyraadka Biyaha ee Dowladda Federaalka Soomaaliya, Mudane Maxamed Cabdullaahi Faarax, Agaasimaha Guud ee Wasaaradda Deegaanka iyo Isbeddelka Cimilada, Mudane Cabdirisaaq Axmed Cali, Ku-xigeenka Madaxa WFP Soomaaliya, Mr. Marco Selva, Wakiillo ka kala socday wasaaradaha dowlad-goboleedyada, Gobolka Banaadir, Hay’ado heer Federaal ah, hay’adaha Qaramada Midoobay (UN), ururrada aan dowliga ahayn (NGOs), iyo bulshada rayidka ah.

Guddoomiyaha SoDMA, Mudane Maxamuud Macallin Cabdulle, oo furitaanka shirka hadal ka jeediyay ayaa carrabka ku adkeeyay muhiimadda uu shirkan u leeyahay dhismaha siyaasad qaran oo dhammaystiran, loo dhan yahay, kana tarjumeysa xaqiiqada ka jirta dalka.

“Aqoon-isweydaarsigan wuxuu na siinayaa fursad aan ku mideyno khibrad, aragti, talo iyo dhaliil si loo helo siyaasad aan kaliya ahayn mid loo dhan yahay, balse sidoo kale la taaban karo, waarta, oo waafaqsan xaaladaha dhabta ah ee dalka ka jira,” ayuu yiri Guddoomiyaha.

Wuxuu sidoo kale dhiirrigeliyay ka qeybgalayaasha in ay si furan oo hufan u muujiyaan aragtidooda, talooyinkooda si dhisid leh u cabbiraan, iyagoo mudnaan siinaya xalal dhab ah oo loo siman yahay, cidna aan laga tagin.