Guddoomiye Ku-xigeenka Hay’adda Maareynta Musiibooyinka Qaranka (SoDMA), Dr. Ahmed Abdi Aadan, ayaa Magaalada Moqdisho daah-furay Shirka Hawlgelinta Guddiga Farsamada Qaranka ee Ka-Hortagga Musiibooyinka Soomaaliya (NTWGAA).
Shirkan waxaa ka qeyb galay madax iyo wakiillo ka socday hay’adaha dowladda, hay’adaha caalamiga ah iyo kuwa maxalliga ah.
Agaasimaha Waaxda Maareynta Khataraha Musiibooyinka ee SoDMA, Mudane Khadar Sh. Maxamed, ayaa faahfaahin ka bixiyay ujeeddada shirka iyo muhiimadda ay leedahay hawlgelinta NTWGAA, taas oo door weyn ka qaadan doonta ka-hortagga iyo wax-ka-qabashada musiibooyinka.
Shirka oo socon doona muddo labo maalmood ah waxaa diiradda lagu saari doonaa dejinta doorka iyo mas’uuliyadaha guddiga, aqoonsiga khataraha mudnaanta leh, iyo diyaarinta qorshe hawleed cad oo lagu xoojinayo dadaallada ka-hortagga musiibooyinka.
Ugu dambeyn, Guddoomiye Ku-xigeenka SoDMA, Dr. Ahmed Abdi Aadan, ayaa carrabka ku adkeeyay in qaadashada tallaabooyin hore iyo iskaashi mideysan ay yihiin furaha lagu yareyn karo saameynta masiibooyinka dabiiciga ah, gaar ahaan abaaraha iyo fatahaadaha, isaga oo xusay in NTWGAA ay tahay madal muhiim u ah isku-duwidda daneeyayaasha iyo xoojinta u-diyaargarowga masiibooyinka dalka.
0 Comments