Baydhabo, Koonfur Galbeed, Soomaaliya — Ku-xigeenka Ergeyga Gaarka ah ee Xoghayaha Guud ee Qaramada Midoobay, ahna Isku-duwaha Arrimaha Bani’aadannimada ee Soomaaliya, Mudane George Conway, ayaa khudbad adag oo xaqiiqda ku saleysan ka jeediyay Shirka Madasha Arrimaha Bani’aadannimada Dalka (CHF 2025) oo lagu qabtay magaalada Baydhabo.Wuxuu si gaar ah diiradda u saaray xaaladda bani’aadannimo ee weli halista ah, isagoo si adag uga digay in hoos u dhaca maalgelinta gargaarka uu halis gelinayo adeegyada aasaasiga ah ee loo baahan yahay.

Mudane Conway ayaa ku boorriyay dhammaan daneeyeyaasha, oo ay ku jiraan:

• Hay’adaha Qaramada Midoobay
• Hay’adaha samafalka caalamiga ah iyo kuwa maxalliga ah
• Dowladda Soomaaliya
• Deeq-bixiyeyaasha
• Ururrada bulshada rayidka ah
• Ganacsiga gaarka loo leeyahay
•  iyo Qurbo-joogta Soomaaliyeed

Wuxuu ugu baaqay in si wadajir ah loo mideeyo dadaalka, si wax looga qabto masiibooyinka soo noqnoqda ee dalka.

Muhiimadda Ka-qaybgalka Qaramada Midoobay ee Shirka CHF

Ka-qaybgalka joogtada ah ee Qaramada Midoobay ee shirarka noocaan ah wuxuu muhiim u yahay isku-duwaha dadaallada gargaarka ee dalka. Iyadoo Qaramada Midoobay ay tahay la-hawlgalaha ugu weyn ee Dowladda Federaalka ee Soomaaliya dhanka gargaarka, ka-qaybgalka Mudane George Conway wuxuu hoosta ka xariiqayaa:

• Ballanqaadka UN-ka: Waxay tilmaamaysaa sida ay uga go’an tahay in la taageero dadaallada gargaarka ee Soomaaliya.
• Isku-duwidda Gargaarka: Shirku wuxuu bixiyaa madal lagu xaqiijinayo in dhammaan dadaallada gargaarka ay la jaan-qaadaan baahiyaha dhabta ah ee dadka Soomaaliyeed.
• Wadashaqayn xooggan: Wuxuu xoojinayaa iskaashiga ka dhexeeya hay’adaha caalamiga ah iyo dowladda, si loo hirgeliyo qorshayaal ay Soomaalidu hormuud ka tahay.

Ugu dambayn, ujeeddada ka-qaybgalka Qaramada Midoobay ee shirka CHF waa in la mideeyo dhinacyada kala duwan, si loo helo xal waara oo wax looga qabto dhibaatooyinka bani’aadannimo ee dalka.