Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay Safiirka Dowladda Qatar ee Soomaaliya, Dr. Cabdullaahi Bin Saalim Al-Nucaymi, iyaga oo ka wada hadlay xoojinta xiriirka iyo iskaashiga walaalnimo ee ka dhexeeya labada dal.

Kulanka waxaa sidoo kale goobjoog ka ahaa Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle. Waxaana diiradda lagu saaray dadaallada lagu wajahayo xaaladda abaarta oo saameysay 4.4 milyan oo muwaadiniin Soomaaliyeed ah, iyo sidii loo adkeyn lahaa mashaariicda horumarineed ee Qatar ka fuliso gudaha Soomaaliya.

Guddoomiyaha SoDMA ayaa tilmaamay in dadka Soomaaliyeed ay u baahan yihiin gargaar degdeg ah iyo garab-istaag mideysan, isagoo xusay muhiimadda ay leedahay in si wadajir ah loola tacaalo dhibaatooyinka ka dhashay abaarta.

Danjiraha Qatar Dr. Cabdullaahi Bin Saalim Al-Nucaymi ayaa xaqiijiyey in Dowladda Qatar ay sii wadi doonto taageerada iyo garab-istaagga shacabka Soomaaliyeed, gaar ahaan ka qeyb qaadashada jawaabaha bani’aadanimada iyo mashaariicda horumarineed.

Ugu Danbeyn Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa uga mahadceliyey Dowladda Qatar kaalinta muuqata ee ay ku leedahay dhismaha dowladnimada Soomaaliya, gaar ahaan arrimaha bani’aadanimada iyo gurmadka abaarta ee soo noqnoqday. Waxa uu ku ammaanay Qatar in ay mar walba tahay saaxiib dhow oo si joogto ah uga jawaaba baahiyaha degdegga ah ee shacabka Soomaaliyeed.