Muqdisho, Soomaaliya — Hay’adda Maareynta Masiibooyinka Soomaaliyeed (SoDMA) ayaa si rasmi ah u shaacisay in ay martigalinayso Madasha Arrimaha Bini’aadanimo ee Soomaaliya (CHF 2025). Madashan oo ah mid si weyn loo wada sugayo, ayaa lagu qaban doonaa magaalada Baydhabo, oo ah xarunta Maamulka Koonfur Galbeed, maalinta Arbacada ee ku beegan 6da Agoosto 2025.

Qabashada madashan ayaa ka markhaati kacaysa sida ay SoDMA uga go’an tahay xoojinta awoodda ka jawaab celinta masiibooyinka heer gobol iyo heer bulsho. Waxay noqon doontaa fursad qaali ah oo ay isugu imaanayaan hoggaamiyeyaasha dalka, khubarada arrimaha bini’aadanimo, iyo dhammaan daneeyayaasha ku shaqada leh, si ay si wadajir ah uga shaqeeyaan xalal waara oo looga jawaabo baahiyaha bini’aadanimo ee sii kordhaya ee Soomaaliya.

Ujeeddooyinka iyo Hadafka Madasha

Ujeedada ugu weyn ee madashani waa in si qoto dheer looga doodo lana helo xalal wax ku ool ah oo ku salaysan saddexdan tiir ee asaasiga ah:

1- Dhiirigelinta Ficilada Maxalliga ah: In la xoojiyo awoodda iyo doorka bulshooyinka deegaanka si ay uga hormaraan xal u helidda dhibaatooyinka ay la kulmaan.

2- Xoojinta Iskaashiga Loo Dhan Yahay: In la dhiso shabakad iskaashi oo dhab ah oo isku xirta dhammaan dhinacyada kala duwan ee bini’aadanimo, oo ay ku mid yihiin hay’adaha dowladda, ururada bulshada rayidka ah, kuwa caalamiga ah, iyo deeq-bixiyeyaasha.

3- Dhisidda Adkaysiga: In la dejiyo istiraatijiyado fog-eeg ah oo lagu xoojinayo nidaamyada maareynta masiibooyinka, si looga hortago dhibaatooyinka mustaqbalka.

Mawduuca Madasha ee Xilligani

Madasha waxaa xilligan diiradda lagu saari doonaa mawduuc muhiim ah oo ah: “Xoojinta Ficilada Bini’aadanimo ee Maxalliga ah, Loo dhan Yahay, iyo Adkaysi leh si Wax looga qabto Baahiyaha Bini’aadanimo ee Sii Kordhaya ee Soomaaliya.”

Ka qeybgalayaasha Waaweyn

Waxaa lagu casuumay in madashan ay ka soo qeybgalaan:

• Madax ka socota Dowladda Federaalka Soomaaliya iyo maamul goboleedyada.
• Wakiillo ka socda hay’adaha Qaramada Midoobay iyo kuwa kale ee caalamiga ah.
• Hoggaamiyeyaasha ururada bulshada rayidka ah ee heer maxalli iyo heer caalami.
• Wakiilo matalaya hay’adaha deeq-bixiyeyaasha ee taageera horumarka iyo bini’aadanimo.

Gunaanad iyo Mahadcelin

SoDMA waxay si gaar ah ugu mahadcelinaysaa Hay’adda Iskaashiga Caalamiga ee Kuuriya (KOICA) iyo Sanduuqa Dadweynaha ee Qaramada Midoobay (UNFPA), oo ah kafaala-qaadayaasha madashan, doorkooda weyn ee ay ka qaateen qabsoomidda munaasabaddan muhiimka ah.

Waxaa dhammaan saxaafadda iyo dadweynaha lagu martiqaadayaa in ay ka soo qeybgalaan si ay ula socdaan wada-hadallada wax-ku-oolka ah iyo ballanqaadyada cusub ee la filayo in la gaaro.

Faahfaahinta Madasha:

• Taariikhda: Arbacada, 6da Agoosto 2025.
• Goobta: Baydhabo, Xarunta Maamulka Koonfur Galbeed.
• Marti-galiye: Hay’adda Maareynta Masiibooyinka Soomaaliya (SoDMA).
• Wixii faahfaahin ah: Fadlan la xiriir Agaasinka Warbaahinta ee SoDMA. Email Address: communications@sodma.gov.so .

Dhammaad