Hay’adda Maareynta Musiibooyinka Qaranka (SoDMA) ayaa magaalada Muqdisho ku qabatay kulan muhiim ah oo looga hadlayay faafinta macluumaadka RIS iyo farriimaha digniinta hore ee loo gudbiyo bulshada iyadoo loo marayo warbaahinta maxalliga ah.
Kulankan oo ay ka soo qayb galeen masuuliyiin ka tirsan SoDMA iyo hay’adaha bah-wadaagta ah, ayaa si qoto dheer loogu falanqeeyay sidii farriimaha khatarta iyo digniinaha hore loo gaarsiin lahaa bulshada si degdeg ah, hufan, isla markaana wax ku ool ah.
Agaasimaha Waaxda Khataraha Musiibooyinka ee SoDMA, Mudane Khadar Sh. Maxamed, waxuu kulanka ka sheegay muhiimadda ay leeyihiin farriimaha digniinta hore, isagoo xusay in bulshada lagu wargeliyo khataraha soo socda ka hor inta aysan dhicin, si loo yareeyo khasaaraha bini’aadam iyo midka hantiyeedba.
Ugu danbeyn Mudane Khadar wuxuu hoosta ka xariiqay baahida loo qabo in warbaahinta maxalliga ahi door ka qaadato gudbinta macluumaadka muhiimka ah, maadaama ay yihiin marin si toos ah u gaara shacabka, gaar ahaan goobaha ay khataruhu ku badan yihiin.
0 Comments