MUQDISHO, SOOMAALIYA — Guddoomiyaha Hay’adda Maareynta Masiibooyinka Soomaaliyeed (SoDMA), Mudane Maxamuud Macallin Cabdulle, ayaa ku dhawaaqay magacaabista Md. Ibrahim Cabdullaahi Axmed (Sheelare) inuu noqdo Agaasimaha cusub ee Waaxda Warfaafinta, Isgaarsiinta iyo Tiknoolajiyada.

Guddoomiyaha ayaa sheegay in magacaabistan ay qayb ka tahay dadaallada SoDMA ee lagu horumarinayo qalabka iyo kanaalada isgaarsiinta, iyada oo ujeedadu tahay in la xoojiyo hufnaanta iyo la adkeeyo xiriirka bulshada, bah-wadaagta gudaha iyo kuwa caalamiga ah, si loo taageero ujeedooyinka bini’aadantinimo ee qaran.

Md. Sheelare wuxuu leeyahay khibrad ballaaran oo dhanka warbaahinta ah, isagoo ka soo shaqeeyay idaacado maxalli ah iyo wasaarado dowladeed oo kala duwan, oo ay ka mid yihiin Wasaaradda Arrimaha Gudaha, Federaalka iyo Dib-u-heshiisiinta, iyo wasaaraddii hore ee Gargaarka iyo Maareynta Masiibooyinka ee Xukuumadda Federaalka Soomaaliya. Bilaha la soo dhaafay, wuxuu ahaa Kusimaha Agaasimaha Waaxda Warfaafinta, Isgaarsiinta iyo Tiknoolajiyada ee SoDMA.

Ugu dambeyntii, Guddoomiyaha ayaa Agaasimaha cusub kula dardaarmay inuu xilkiisa u guto si daacadnimo, masuuliyad iyo waddaniyad leh, isagoo u rajeeyay guul iyo horumar ku aaddan gudashada hawsha bini’aadantinimo ee hay’adda.