Guddoomiyaha SoDMA oo Soo Xiray Shirka Wadatashiga Dib-u-eegista Siyaasadda Qaranka ee Maareynta Masiibooyinka
Guddoomiyaha Hay’adda Maareynta Masiibooyinka Soomaaliyeed (SoDMA), Mudane Maxamuud Macallin Cabdulle, ayaa maanta si rasmi ah ugu soo xiray magaalada Muqdisho Shirka Wadatashiga Dib-u-eegista Siyaasadda Qaranka ee Maareynta Masiibooyinka, oo socday Muddo Labo Malin ah, kana mid ahaa dadaallada lagu tayeynayo siyaasadda qaran ee arrimaha musiibooyinka.
Shirkan muhiimka ah ayaa diiradda lagu saaray dib-u-eegis qaran oo dhammaystiran, iyadoo la tixgelinayo baahida dalka, khibradaha jira, iyo codka daneeyayaasha kala duwan ee ka shaqeeya arrimaha gargaarka iyo maaraynta masiibooyinka.
Intii uu socday shirka, waxaa si qoto dheer looga dooday sidii loo heli lahaa siyaasad qaran oo:
- Hufan
- Cadaalad ah
- Qaran ahaan loo dhan yahay
- Loogana jawaabayo caqabadaha masiibooyinka dalka
Guddoomiye Maxamuud Macallin Cabdulle ayaa bogaadiyey doorka ka qeybgalayaasha iyo sida ay diiradda u saareen gaarista hiigsiga iyo himilada siyaasadda qaran. Wuxuu tilmaamay in shirkan uu yahay tallaabo muhiim u ah dhismaha nidaam maareyn masiibo oo casri ah, karti leh, isla markaana la jaanqaadaya xaaladda Soomaaliya.
0 Comments