Guddoomiyaha Hay’adda Maareynta Masiibooyinka Soomaaliyeed (SoDMA), Mudane Maxamuud Macalin Cabdulle, ayaa maanta kulan miro-dhal ah kula yeeshay xarunta Hay’adda wafdi ka socda Switzerland Development Cooperation (SDC), oo hogaaminayay Ku-Xigeenka Madaxa Iskaashiga Caalamiga ah ee Geeska Afrika Mr. Julien Peissard.

Kulanka waxaa diiradda lagu saaray xoojinta iskaashiga u dhexeeya SoDMA iyo SDC, gaar ahaan kor u qaadidda adeegyada diyaar-garowga degdegga ah, wax ka qabashada masiibooyinka soo noqnoqda, iyo taageerada bulshooyinka nugul. Si gaar ah, waxaa xoogga loogu saaray xaaladda abaarta ee dalka ka jirta, taasoo saameyn weyn ku yeelatay nolosha dadka Soomaaliyeed.

Guddoomiyaha Hay’adda SoDMA Mudane Maxamuud Macalin Cabdulle ayaa uga mahadceliyay Dowlada Switzerland doorkooda taageerada bini’aadannimo iyo gargaarka degdegga ah, isaga xusay in iskaashigooda uu muhiim u yahay horumarinta nidaamka maareynta masiibooyinka dalka.

Dhankooda, masuuliyiinta kasocotay SDC ayaa ammaanay dadaalka SoDMA ee ku aaddan kobcinta awoodda waxka qabashada Musiibooyinka dalka, waxayna ballanqaadeen inay sii wadi doonaan taageerada SoDMA si wax looga qabto xaaladda bani’aadannimo ee dalka.