Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle, ayaa furay shir lagu horumarinayo habraacyada shaqo ee barnaamijka Ka Jawaabista Degdegga ah ee Ilaalinta Bulshada (SRSP).

Shirkan oo soconaya muddo saddex maalmood ah waxaa martigelisay Hay’adda SoDMA, waxaana ka qayb galaya masuuliyiin ka socda Wasaaradda Shaqada iyo Arrimaha Bulshada, Dowlad Gobaleedka dalka iyo Hay’adda Cunnada Adduunka (WFP).

Guddoomiye Maxamuud Macalin ayaa khudbaddiisa ku adkeeyay muhiimadda iskaashiga qaran iyo midka caalami ee ku saabsan diyaarinta iyo ka jawaabidda xaaladaha degdegga ah. Wuxuu xusay in shirkaani yahay tallaabo muhiim ah oo lagu horumarinayo habraacyo mideysan oo ay si wadajir ah u adeegsadaan hay’adaha bah-wadaagta ah.

Sidoo kale, wuxuu ku boorriyay ka qaybgalayaasha inay si firfircoon uga qayb qaataan doodaha iyo hawlaha farsamo, isagoo shaaca ka qaaday in guusha shirka ay ku xirnaan doonto wada-shaqeynta iyo khibradda ay hay’aduhu soo bandhigaan.

Ugu dambeyn, Guddoomiyuhu wuxuu u mahadceliyay Hay’adda WFP iyo dhammaan bah-wadaagta taageeraya dadaallada lagu xoojinayo adkeysiga bulshada iyo hay’adaha dowladda.