Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle, ayaa maanta shir guddoomiyay kulan gaar ah oo diiradda loogu saaray xaaladda abaareed ee dalka ka jirta iyo saameynta sii kordheysa ee ka dhalatay roobabkii oo daahay iyo gargaar yaraaday.

Shirka ayaa waxaa ka qeyb galay Guddoomiye Ku-xigeenka SoDMA Dr. Axmed Cabdi Aadan, Agaasimeyaasha waaxyaha kala duwan, Lataliyaasha Hay’adda iyo khubaro farsamo oo qeyb ka ah qorsheynta gurmadka degdegga ah.

Intii uu shirku socday, waxaa si qoto dheer loo falanqeeyay xaaladda abaarta ba’an ee ku fiday qeybo badan oo dalka ka mid ah, taas oo ka dhalatay roob la’aan joogto noqotay iyo hoos u dhac ku yimid deeqihii bani’aadantinimo ee Soomaaliya kasii jiray. Mas’uuliyiintu waxay isla meel dhigeen in loo baahan yahay:

.Dardar-gelinta samatabbixinta degdegga ah, Kordhinta wada-shaqeynta hay’adaha dawliga ah iyo kuwa caalamiga ah,Abuurista qorshe maareyn oo looga hortago khatarta sii kordheysa ee abaarta.

Guddoomiye Ku-xigeenka SoDMA, Dr. Axmed Cabdi Aadan, oo warbaahinta la hadlay kulanka kaddib, ayaa sheegay in hay’addu ay wado dadaallo joogto ah oo lagu badbaadinayo bulshooyinka ugu nugul, isagoo bulshada caalamka ugu baaqay inay kordhiyaan taageerada ay u fidinayaan Soomaaliya.

Ugu danbeyn Hay’adda Mareynta Musiibooyinka Qaranka ayaa guddi gaar ah oo Farsamo u xil saartay waxka qabashada iyo talo bixinta abaarta dalka soo wajahday.