Guddoomiyaha Hay’adda Maareynta Musiibooyinka Soomaaliyeed (SoDMA), Mudane Maxamuud Macallin Cabdulle, ayaa soo xiray kulan wadatashi ah oo looga hadlay xaaladda waddada isku xirta Muqdisho iyo Baydhabo.

Kulanka, oo ay taageertay UNICEF, waxaa diiradda lagu saaray qiimeynta xaaladda waddada iyo caqabadaha amni ee saameeya isu-socodka, gaar ahaan gaarsiinta gargaarka iyo taageerada bani’aadannimo. Waxaa sidoo kale lagu soo bandhigay xog iyo warbixin ku saabsan xaaladda amni ee marinka iyo habka loo ururinayo xogta, si loo fahmo caqabadaha jira loona diyaariyo habraac lagu fududeynayo isu-socodka gargaarka.

Ugu danbeyn, Guddoomiyaha Hay’adda SoDMA ayaa adkeeyay muhiimadda ay leedahay xoojinta wada-shaqeynta iyo isku-duwidda dhinacyada ay khusayso, si loo xaqiijiyo in gargaarka bani’aadannimo si ammaan ah oo joogto ah loo gaarsiiyo dadka u baahan.