Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle, ayaa maanta furay kulan heer gobol ah oo lagu qabtay magaalada Beledweyne ee Gobolka Hiiraan, kaas oo looga hadlayay saadaasha El Niño 2026 iyo xoojinta u-diyaargarowga khataraha ka dhalan kara.

Kulanka oo socon doonna Maalmaha soo socda waxaa Maanta kaqeybgalay, Culimadda, odayaasha, Haweenka, dhalinyarada iyo Ururada Bulshada Rayidka ah, hay’adaha Calamiga ah iyo kuwa Maxaliga ah.

Sidoo kale waxaa Maalmaha soo socda ka qeyb galaya Maamulka Gobalka, Maamulka Degmada iyo wasaarada Gargaarka iyo Maareynta Musiibooyinka Hirshabelle.

Shirka waxaa diiradda lagu saaray xog-wadaagga saadaasha cimilada, qiimeynta khataraha la filayo iyo qaadista tallaabooyin hore oo lagu yareynayo saameynta musiibooyinka.

Guddoomiyaha Hay’adda SoDMA Mudane Maxamuud Macalin Cabdulle oo kahadlay Shirka waxuu hadalkiisa diiradda ku saaray khataraha fatahaadaha iyo roobabka xooggan ee laga filayo, isagoo ku adkeeyay muhiimadda ay leedahay in si degdeg ah loo qaado tallaabooyin hore oo lagu yareynayo saameynta musiibooyinka.

Guddoomiyahu waxuu sidoo kale Bulshada ugu baaqay in la xoojiyo nadiifinta biyo-mareennada, nidaamyada digniinta hore, diyaarinta agabka gurmadka iyo qorshayaasha daad-gureynta, si loo ilaaliyo nolosha iyo hantida shacabka.

Ugu dambeyn, Mudane Maxamuud Macalin Cabdulle wuxuu adkeeyay muhiimadda ay leedahay wadashaqeynta iyo isku-duwidda Maamulka Gobolka, Maamulka Degmada, hay’adaha caalamiga ah iyo kuwa maxalliga ah, si loo xaqiijiyo u-diyaargarow degdeg ah, wax-ku-ool ah iyo isku-dubarid wanaagsan oo looga hortagayo saameynta ka dhalan Karta khatarta la saadaalinayo.