Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macallin Cabdulle, oo ay wehliyaan Wasiirka Gargaarka iyo Maareynta Musiibooyinka Dowlad Goboleedka Waqooyi Bari iyo Duqa Magaalada Laascaanood, ayaa si rasmi ah xarigga uga jaray Xarunta Gurmadka Degdegga ah ee Waqooyi Bari, taas oo si buuxda loo dhameystiray.

Wasiirka Gargaarka iyo Maareynta Musiibooyinka Dowlad Goboleedka Waqooyi Bari, Mudane Maxamed Diiriye Shariif, ayaa uga mahadceliyay Hay’adda SoDMA iyo Dowladda Shiinaha taageerada ay ka geysteen hirgelinta iyo dhismaha xaruntan cusub.

Hay’adda SoDMA, oo fulinaysa amarka Ra’iisul Wasaaraha XFS, Mudane Xamsa Cabdi Barre, ayaa horay u dhagax-dhigtay dhismahan, waxaana maanta si rasmi ah loogu wareejiyay Dowladda Waqooyi Bari.

Ugu dambeyn, Guddoomiyaha Hay’adda SoDMA, Mudane Maxamuud Macallin Cabdulle, ayaa dardaaran u jeediyay mas’uuliyiinta, isagoo ku boorriyay inay Xarunta Gurmadka Degdegga ah uga faa’iideystaan dardargelinta gurmadka bani’aadannimo, u adeegidda bulshada iyo xoojinta wada-shaqeynta Dowladda Federaalka iyo Dowlad Goboleedka Waqooyi Bari.