Guddoomiye Ku-xigeenka Hay’adda Maareynta Musiibooyinka Qaranka (SoDMA), Dr. Axmed Cabdi Aadan, ayaa qaabilay wafdi ka socda hay’adda Refugees International (RI), oo uu hoggaaminayo Madaxa hay’adda, Jeremy Konyndyk, iyo Cabdullaahi Boru Halakhe, oo Refugees International u qaabilsan Bariga iyo Koonfurta Afrika.

Kulanka waxaa looga hadlay xaaladda bani’aadannimo ee Soomaaliya, taageerada gargaarka iyo xoojinta iskaashiga dhinacyada bani’aadannimada, gaar ahaan wax ka qabashada baahiyaha bulshada ay saameeyeen dhibaatooyinka bani’aadannimo.

Wafdiga Hay’adda Caalamiga ah ee Qaxootiga Refugees International (RI), ayaa sheegay inay dadaal gelinayaan sidii dib loogu soo celin lahaa maalgelintii bani’aadannimo ee Dowladda Mareykanka ay Soomaaliya siin jirtay, taas oo muddo hakad ku jirtay.

Ugu danbeyn, Hay’adda SoDMA waxay wafdiga u bandhigtay qorshayaasheeda ku aaddan wax ka qabashada xaaladaha bani’aadannimo, u-diyaargarowga iyo ka-hortagga saameynta saadaasha El Niño, iyadoo xoogga la saarayo in dalka loo diyaariyo awood gudaha ah oo wax looga qaban karo xaaladaha degdegga ah, lana yareeyo ku-tiirsanaanta deeqaha caalamiga ah.