Waxaa magaalada Muqdisho lagu soo xiray shir muhiim ah oo looga hadlayay sugnaanta cuntada, xilli dalka ay ka jirto abaar baaxad leh oo si weyn u saameysay qaybaha kala duwan ee bulshada. Shirkan oo ka dhacay Xarunta Dhexe ee SoDMA, ayaa lagu gorfeeyay xaaladda abaarta iyo saamaynta ay ku yeelatay bulshada nugul, kuwaas oo ay ka mid yihiin haweenka, carruurta, waayeelka iyo dadka naafada ah.

Intii shirka uu socday, waxaa diiradda la saaray sidii loo dardargelin lahaa isku-duwidda gargaarka, loo wanaajin lahaa adeegyada taageerada bulshada, loona abuuri lahaa qorshe mideysan oo wax looga qaban karo xaaladaha degdegga ah ee ka taagan dalka.

Shirkan ayaa astaan u noqday hoggaanka cusub ee dowladda ee dhanka isku-duwidda gargaarka bani’aadamnimo, maadaama uu yahay kii ugu horreeyay ee fool-ka-fool ah oo ay dowladda martigeliso tan iyo xilligii COVID-19.

Ugu danbeyn Shirkaan waxaa soo xiray Agaasimaha Waaxda Sugnaanta iyo ilaalinta Bulshada cuntadda Abubakar Ahmed Mohamed.