BEIJING, SHIINAHA — Iyada oo qayb ka ah dadaallada ay ku xoojinayso awooddeeda qaranka ee maareynta masiibooyinka iyo ka jawaabista bini’aadantinimada, ayaa maanta saraakiil ka tirsan Hay’adda  Maareynta Masiibooyinka Soomaaliyeed (SoDMA) waxay booqatay Xarunta Degdegga ah ee Ururka Laanqeyrta Cas ee Shiinaha. Booqashadani waxay qayb ka tahay barnaamij tababar oo degdeg ah oo soconaya 24 maalmood, kaas oo ujeedadiisu tahay in kooxda Soomaalida lagu qalabeeyo aqoontii iyo waayo-aragnimadii ugu dambeysay ee dhinacyada yareynta khataraha masiibooyinka, u diyaar garowga degdegga ah, iyo ka hortagga xiisadaha.

Booqashadan ayaa ah mid aad muhiim ugu ah tababarka, maadaama xubnaha kooxda ay arkeen tiknoolajiyaddii ugu dambaysay ee ka jawaabista degdegga ah. Waxaa la soo bandhigay qalab casri ah oo dhamaystiran, oo ay ku jiraan gaadiidka degdegga ah ee loogu talagalay in ay gaaraan meelaha fogfog, diyaaradaha degdegga ah ee lagu qalabeeyay hawlaha gurmadka iyo badbaadinta cirka, iyo sidoo kale qalab casri ah iyo teknooloojiyad loo isticmaalo isku xirka hawlaha goobta si hufan.

Booqashadani waxay ka dhigan tahay tallaabo istiraatiiji ah oo lagu dhisayo awoodda Soomaaliya ee ay si wax ku ool ah uga hortagi karto caqabadaha bini’aadantinimada ee mustaqbalka. Tababarkan, SoDMA waxay ku doonaysaa in ay ku horumariso xirfadlayaal Soomaaliyeed oo awood u leh in ay fuliyaan hababka ugu wanaagsan ee caalamiga ah, taas oo gacan ka geysan doonta badbaadinta nolosha iyo ilaalinta bulshooyinka ugu nugul. Hindisahan wuxuu sidoo kale muujinayaa sida SoDMA ay uga go’an tahay xoojinta iskaashiga bini’aadantinimo ee caalamiga ah iyo dhisidda iskaashiyo xooggan oo lala yeesho ururada la midka ah ee adduunka.

Dadaalladan waxay xaqiijinayaan in shaqada bini’aadantinimada aysan ahayn fal-celin keliya, balse ay tahay aragti hormar ah oo maalgashi ku samaynaysa dadka iyo awoodahooda. Tallaabo kasta oo loo qaado xagga dhisidda aqoonta iyo horumarinta xirfadaha, Soomaaliya waxay u gudbaysaa mustaqbal ammaan iyo adkaysi badan, halkaas oo u diyaar garowgu uu yahay gaashaan ka hor masiibooyinka.