Muqdisho, Soomaaliya — Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macalin Cabdulle, ayaa maanta kulan muhiim ah isugu yeeray culimo, ganacsato iyo wakiillo ka socday shirkadaha isgaarsiinta iyo bangiyada si looga wada hadlo sidii gurmad degdeg ah loogu fidin lahaa dadka ay abaaruhu saameeyeen ee ku nool gobolka Awdal.

Kulanka oo ka dhacay xarunta dhexe ee SoDMA, ayaa lagu xoojiyay baahida loo qabo iskaashi ballaaran oo dhexmara bulshada iyo hay’adaha kala duwan si loo xakameeyo dhibaatada ka jirta Awdal. Guddoomiye Maxamuud Macalin Cabdulle ayaa caddeeyay in dowladda federaalka ay horey u bixisay $700,000 oo loogu talagalay gurmadka, wuxuuna ugu baaqay ganacsatada inay lacag intaa la eg bixiyaan si loo helo taageero midaysan.

Culimada ka soo qayb gashay ayaa ku boorisay ganacsatada in ay kaalin mug leh ka qaataan samafalka, iyagoo xusuusiyay in kaalmeynta dadka dhibaataysan ay tahay waajib diini iyo bani’aadannimo labadaba. Dhammaan ka qaybgalayaashii kulanka ayaa ballanqaaday inay si buuxda uga qayb qaadanayaan gurmadka, isla markaana ay sii wadi doonaan wada-shaqaynta SoDMA. Waxay sidoo kale codsadeen in la qabto kulan kale oo looga hadlo tallaabooyinka xiga iyo sidii loo ururin lahaa dhaqaale dheeraad ah.

Tan iyo markii dib loo hawl geliyay qaybtii labaad ee sannadka 2022, Hay’adda Maareynta Musiibooyinka Qaranka Soomaaliyeed (SoDMA) waxay door muhiim ah ka ciyaartay ka-jawaabista musiibooyinka kala duwan. Dadaalladeedu waxay xambaarsanaayeen la tacaalidda fatahaadihii ba’naa ee ku dhuftay qaybo badan oo Soomaaliya ka mid ah sannadkii 2023, la dagaallanka abaaraha soo noqnoqda, sugnaanta cunnada, iyo bixinta gargaarka bani’aadannimo ee dadka barakacayaasha ah. Hay’addu waxay noqotay udub-dhexaadka jawaab-celinta dowladda ee musiibooyinka, iyada oo kaalin lama huraan ah ka qaadata ilaalinta nolosha iyo hantida muwaadiniinta.