Magaalada Muqdisho waxaa ka dhacay shir ay soo qaban-qaabisay Hay’adda Maareynta Masiibooyinka Qaranka (SoDMA), kaas oo looga hadlayay isku-duwidda dadaallada ka-jawaabista abaaraha iyo xoojinta gargaarka degdegga ah ee bulshooyinka nugul.
Shirkan waxaa ka qaybgalay Wasaaraddaha iyo hay’adaha dowladda, kuwaas oo falanqeeyay xaaladda abaarta ee dalka iyo baahiyaha degdegga ah ee bulshada. Waxaa sidoo kale la soo bandhigay xogta ugu dambeysay ee saameynta abaarta, iyadoo la muujiyay meelaha ugu daran iyo tirada dadka ay saameysay.
Ka qaybgalayaashu waxay isla meel dhigeen muhiimadda ay leedahay midaynta qorshayaasha gargaarka si loo hubiyo in kaalmo bani’aadannimo ay si hufan oo degdeg ah u gaarto dadka ugu baahan, gaar ahaan carruurta, haweenka, iyo qoysaska nugul.
Waxaa sidoo kale looga hadlay sidii loo xoojin lahaa iskaashiga Hay’adaha dowladda si horumariyo nidaamka gurmadka iyo ka-jawaabista xaaladaha degdegga ah.
0 Comments