Magaalada Moqdisho waxaa lugu xiray Shirka Madasha Bini’aadannimada Soomaaliya (𝗖𝗛𝗙 𝟮𝟬𝟮𝟲) kaas oo diiradda lagu saaray xoojinta dadaallada ka hortagga masiibooyinka iyo dhisidda u adkeysiga abaaraha.

Shirkan oo ay soo qaban-qaabisay Hay’adda Maareynta Musiibooyinka (SoDMA), ayaa hal-ku-dheggiisi ahaa:“𝗙𝗿𝗼𝗺 𝗥𝗲𝘀𝗽𝗼𝗻𝘀𝗲 𝘁𝗼 𝗣𝗿𝗲𝘃𝗲𝗻𝘁𝗶𝗼𝗻: 𝗔𝗱𝘃𝗮𝗻𝗰𝗶𝗻𝗴 𝗣𝗿𝗼𝗮𝗰𝘁𝗶𝘃𝗲 𝗗𝗥𝗠 𝗮𝗻𝗱 𝗗𝗿𝗼𝘂𝗴𝗵𝘁 𝗥𝗲𝘀𝗶𝗹𝗶𝗲𝗻𝗰𝗲 𝗶𝗻 𝗦𝗼𝗺𝗮𝗹𝗶𝗮”, waxaana ka qeyb galay masuuliyiin ka kala socday dowladda federaalka, dowlad-goboleedyada, hay’adaha Qaramada Midoobay, safaaradaha, ururrada samafalka, ganacsatada, iyo bulshada rayidka ah.

Guddoomiyaha Hay’adda Maareynta Musiibooyinka Qaranka Soomaaliyeed, Mudane Maxamuud Macalin Cabdulle, ayaa gabagabadii shirka sheegay in ay muhiim tahay in la xoojiyo iskaashiga iyo jawaab-celinta degdegga ah, si wax looga qabto saameynta abaaraha ka jira dalka.

Ra’iisul Wasaare Ku-xigeenka Dalka Mudane Saalax Ahmed jaamac oo khudbad xiritaan ah jeediyay ayaa sheegay in waqtigu yahay mid muhiim u ah in Soomaaliya ay ka gudubto ku tiirsanaanta gargaarka dibadda, isla markaana ay qaadato siyaasad ku dhisan isku-tashi iyo ka hortag. Wuxuu xusay in isbeddel weyn uu ku yimid habka gargaarka bini’aadannimo ee caalamka, iyadoo deeqihii la siin jiray Soomaaliya ay hoos u dhaceen sababo la xiriira colaadaha iyo duruufaha cakiran ee ka jira dunida, gaar ahaan Bariga Dhexe.

Mudane Saalax ayaa carrabka ku adkeeyay in Dowladda Federaalka iyo Dowlad-goboleedyadu ay mas’uuliyad gaar ah ka saaran tahay ka jawaabidda baahiyaha shacabka, iyagoo adeegsanaya ilaha gudaha sida canshuuraha, iskaashiga ganacsatada, iyo taageerada bulshada Soomaaliyeed.

Ugu danbeyn Shirka ayaa kusoo dhammaaday is-afgarad guud oo ku saabsan xoojinta iskaashiga, dejinta talooyin wax ku ool ah, iyo qaadista tallaabooyin cad oo lagu hirgelinayo istaraatiijiyadda ka hortagga masiibooyinka iyo dhisidda mustaqbal adkeysi leh oo Soomaaliya ay yeelato.

#CHF2026
#Abaaraha
#Soomaaliya