Guddoomiyaha Hay’adda Maareynta Masiibooyinka Qaranka Soomaaliyeed (SoDMA), Mudane Maxamuud Macalin Cabdulle, ayaa ka qaybgalay shir wadatashi heer qaran oo ay soo qaban-qaabisay Wasaaradda Qorsheynta, Maalgashiga iyo Horumarinta Dhaqaalaha, kaas oo diiradda lagu saaray xoojinta diyaar-garowga iyo ka jawaabista abaarta dalka ka jirta.

Shirkan waxaa ka qaybgalay wasaaradaha muhiimka ah ee wax-soo-saarka iyo Xafiiska Ra’iisul Wasaaraha, waxaana lagu soo bandhigay warbixinadii ugu dambeeyay ee xaaladda Sugnaanta Cuntada, iyadoo si faahfaahsan loo falanqeeyay saameynta abaarta ee ku timid dadka iyo xoolaha.

Waxaa sidoo kale lagu soo bandhigay Qorshaha Jawaabta Degdegga ah iyo Midka Mudada Gaaban ee SoDMA, iyo Qorshaha Diyaar-garowga Sugnaanta Cunnada (FSCPP), oo muhiim u ah xoojinta adkeysiga bulshada, gaar ahaan qoysaska nugul.

Ugu dambeyn, Guddoomiyaha SoDMA, Mudane Maxamuud Macalin Cabdulle, ayaa sheegay in dalka uu ku sugan yahay xaalad abaareed oo adag, isagoo ku baaqay in wadajir looga shaqeeyo badbaadinta dadka iyo xoolaha.