Guddoomiye ku xigeenka Hay’adda Maareynta Musiibooyinka, Dr. Axmed Cabdi Aadan, ayaa ka qeyb-galay furitaanka aqoon-is-weydaarsi heer sare ah oo soconaya muddo laba maalmood ah, kaas oo diiradda lagu saarayo siyaasadda iyo qaab-dhismeedka nidaamka isgaarsiinta xaaladaha degdegga ah iyo Nidaamka Digniinta Hore ee Taleefannada Gacanta (CB-EWS).
Aqoon-is-weydaarsigan ayaa qeyb ka ah Tiirka 3aad ee hindisaha “Digniinta Hore ee Loo Dhan Yahay” EW4ALL, waana dadaal wadajir ah oo ay hormuud u yihiin Hay’adda SoDMA oo Dowladda Soomaaliya masuul kaga ah howlaha digniinta hore isla-markaana hore u soo qabatay tiirarkii 1-aad iyo 2-aad ee hindisaha iyo Hay’adda Isgaarsiinta Qaranka oo tiirka 3-aad soo qaban-qaabisay.
Maareeyaha Guud ee Hay’adda Isgaarsiinta Qaranka, Md. Mustafa Yaasiin Sheekh ayaa si rasmi ah u furay aqoon-is-weydaarsigaan oo ay ka soo qeyb galeen daneeyayaal muhiim ah Sida; shirkadaha isgaarsiinta, bixiyeyaasha internetka iyo hay’ado kale oo dowladeed.
Inta lagu jiro aqoon-isweydaarsiga, waxaa si qoto dheer looga doodayaa xeerarka iyo shuruucda farsamo ee nidaamka CB-EWS, wadashaqaynta hay’adaha kala duwan, iyo qorshaha mideysan ee lagu hirgelinayo nidaamkan si bulshada Soomaaliyeed ay uga faa’iideysato digniino hore oo waxtar leh marka ay timaado xaalad degdeg ah
0 Comments