Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macalin Cabdulle, ayaa maanta magaalada Xeraale ee Galmudug ka daahfuray biyo dhaamin degdeg ah oo loogu gurmanayo qoysaska ay abaartu saameysay.

Guddoomiyaha Hay’adda SoDMA oo safar shaqo ku maraya deegaannada Galmudug, isla markaana ay wehlinayeen Masuuliyiin katirsan Galmudug oo kala ah Wasiirka Biyaha iyo Tamarta, Wasiirka Qorshaynta iyo Agaasimaha Guud ee Wasaaradda Gargaarka, ayaa sheegay in gurmadkan oo gaaraya ilaa 70 booyadood lagu yareynayo biyo la’aanta baahsan ee ka jirta degmada iyo nawaaxigeeda.

Mudane Maxamuud Macalin Cabdulle ayaa sidoo kale warbixin ka dhageystay bulshada deegaanka, isagoo adkeeyay in biyo dhaamintaan ay mudnaan gaar ah siinayo qoysaska ugu nugul, isla markaana uu qeyb ka yahay dadaallada joogtada ah ee lagu xoojinayo gurmadka abaaraha.