Ra’iisul Wasaare Ku-xigeenka Jamhuuriyadda Federaalka Soomaaliya, Mudane Saalax Axmed Jaamac, iyo Wasiiru Dowlaha Horumarinta Caalamiga ah iyo Arrimaha Afrika ee Dowladda Boqortooyada Ingiriiska, Marwo Baroness Chapman, ayaa si wadajir ah u shir guddoomiyay kulan fogaan arag ah oo ay ka qeybgaleen deeq-bixiyeyaal iyo hay’ado caalami ah.

Shirkaan waxuu ku soo beegmay xilli Hay’adda SoDMA ay waday dadaallo xooggan oo lagu wajahayo abaarta ba’an ee dalka ka jirta. Qiyaastii 6.5 milyan oo qof ayaa la ildaran cunto yari, halka in ka badan 2 milyan oo qof ay noloshoodu halis ku jirto, iyadoo nafaqo-darraduna sii kordhayso.

Kulanka waxaa ka qeybgalay Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle, oo warbixin ka jeediyay xaaladda bini’aadannimo ee dalka, gaar ahaan saameynta abaarta daba-dheeraatay ay ku yeelatay bulshada Soomaaliyeed. Sidoo kale, shirka waxaa ka qeybgalay wakiillo ka socday Bangiga Adduunka, Midowga Yurub, OCHA, WFP, FAO, IFAD, Save the Children, Oxfam iyo CARE International, iyo hay’ado kale oo daneeya arrimaha gargaarka bini’aadannimo iyo horumarinta Soomaaliya.

Dowladda Federaalka Soomaaliya ayaa horraantii bishan Febraayo u gudbisay beesha caalamka qorshe dhammaystiran oo looga jawaabayo xaaladda abaarta, isla markaana lagu xoojinayo awoodda bulshooyinka ee u adkeysiga Musiibooyinka.

Ugu dambeyn, Ra’iisul Wasaare Ku-xigeenka ayaa soo xiray shirka, isagoo uga mahadceliyay dhammaan ka-qeybgalayaasha iyo deeq-bixiyeyaasha ballanqaaday maalgelinta qorshaha ka jawaabista cunno-yaraanta iyo nafaqo-darrada, kuna boorriyay in la dardargeliyo fulinta taageerada si loo xoojiyo gurmadka iyo horumarinta waarta ee dalka.