Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macalin Cabdulle, ayaa magaalada Muqdisho ku soo xiray shir qaran oo ballaaran, kaas oo diiradda lagu saaray dardargelinta ka-jawaabista abaaraha ka jira qaybo badan oo ka mid ah dalka.

Shirkan, oo ka dhacay Xarunta Gurmadka Degdegga ah ee Hay’adda SoDMA, waxaa ka qeyb galay wasiirro ka socday dowlad-goboleedyada dalka, Maamulka Gobolka Banaadir, Xafiiska Ra’iisul Wasaaraha, iyo masuuliyiin kale oo heer federaal iyo heer dowlad-goboleed ah.

Intii uu shirku socday, waxaa si qoto dheer diiradda loo saaray qiimeynta xaaladda abaaraha ee dalka, saameynta ay ku yeesheen nolosha bulshada, iyo sidii si wadajir ah, degdeg ahna looga jawaabi lahaa baahiyaha aasaasiga ah ee dadka ay abaaruhu saameeyeen.

Wasiirrada dowlad-goboleedyada ayaa shirka ku soo bandhigay saameynta ba’an ee ay abaaruhu ku yeesheen deegaanadooda, iyaga oo hoosta ka xarriiqay baahida loo qabo in gargaar degdeg ah oo wax ku ool ah la gaarsiiyo dadka nugul ee ay musiibadani saameysay.

Guddoomiyaha Hay’adda SoDMA, Mudane Maxamuud Macalin Cabdulle, ayaa hadal uu ka jeediyay gabagabada shirka ku adkeeyay ka qeyb galayaasha shirka muhiimadda ay leedahay in si degdeg ah loo fidiyo gargaar bani’aadannimo, si loo badbaadiyo nolosha dadka ay abaaruhu saameeyeen loona yareeyo saameynta musiibada. Waxa uu sidoo kale ku baaqay iskaashi, wada-shaqeyn iyo isku-duubni dhexmarta dhammaan hay’adaha ay khusayso ka-jawaabista abaaraha.

Ugu dambeyn, Guddoomiyuhu waxa uu tilmaamay in Hay’adda SoDMA ay sii wadi doonto dadaallada gurmadka, isku-xirka hay’adaha kala duwan, iyo hagidda howlaha bani’aadannimo, si loo xaqiijiyo in gargaar wax ku ool ah uu gaaro bulshada ku nool deegaanada ay abaaruhu sida daran u saameeyeen.